Posts
បច្ចុប្បន្នស្ថិតនៅក្បែរផ្លូវជាតិមួយ រវាងខេត្តសុរិន្ទ្រ និង ខេត្តស៊ីសាកេត ប្រាសាទអាណារ គឺជាប្រាសាទឥដ្ឋមួយ ស្ថិតក្នុងរចនាបថបាពួន ដែលសាងសង់ឡើងនៅលើខឿនមួយធ្វើអំពីថ្មបាយក្រៀម ។ ភាពទ្រុឌទ្រោមគួបផ្សំនឹងការខ្វះការថែរក្សា នៃប្រាសាទខាងលើនេះ ធ្វើឲ្យយើងសង្វេគចិត្តជាខ្លាំង នៅពេលមកកាន់ទេវស្ថានសម័យអង្គរនេះ ។
ប្រាសាទអាណា និងផ្តែរ ស.ត ទី ១១ (ថត ១៩៧៩)
អ្នកស្រុកក្នុងតំបន់ នាំគ្នាហៅប្រាសាទនេះថា ប្រាសាទអាណារ តាំងពីសម័យបុរាណកាល រហូតដល់បច្ចុប្បន្ន (ឆ្នាំ ១៩៧៦) ។ ប្រាសាទនេះ ត្រូវជនជាតិខ្មែរ ក្នុងតំបន់ចាត់ទុកជាទីតាំងមួយដ៏ស័ក្តិសិទ្ធិណាស់ ។ យោងតាមថេរដីការបស់លោកចៅអធិការវត្តអាណារ ពីដើមនៅត្រង់ប្រាសាទនេះ ដែលស្ថិតនៅក្បែរបឹងមួយយ៉ាងធំនោះ គឺជាកន្លែងមួយដ៏សែនស័ក្តិសិទ្ធិ ។ ព្រោះថា បងប្អូនជនជាតិខ្មែរមកបន់ស្រន់សុំទឹកភ្លៀង ដោយពួកគេ ធ្វើពិធីបញ្ជាន់អារក្ខ នៅលើទួលប្រាសាទនេះ ។ ឥឡូវនេះ ប្រពៃណីនេះ ត្រូវបានបោះបង់ចោលទៅហើយ ។ ព្រះអង្គ ក៏បានបង្ហើបឲ្យដឹងទៀតថា លក្ខណៈពិសិដ្ឋ នៃប្រាង្គប្រាសាទអាណារនេះ ក៏បណ្តាលមកពីវត្តមានរបស់ចម្លាក់ តំណាងឲ្យព្រះបដិមាបុរាណមួយអង្គ ដែលមានដៃច្រើន នៅក្នុងតួប៉មនៃប្រាសាទនេះ តែឥឡូវត្រូវពួកចោរអន្ធពាល លួចប្លន់ទៅលក់ ឯទីក្រុងមឿងកក់ (បាងកក់) បាត់ទៅហើយ ។
>>>អានបន្ត
Phnom Penh Time
